ရွှေ့ပြောင်းအလုပ်သမားများ ဘ၀တိုးတက်ရေး အထောက်အကူပြု သင်တန်းကျောင်းဖွင့်

မြတ်ခိုင်ဦး/၂၁ ဇွန် ၂၀၁၀ ခေတ်ပြိုင်

ထိုင်းနိုင်ငံတွင် ပညာသင်ကြားနေသော မြန်မာကျောင်းသားကျောင်းသူများနှင့် ရွှေ့ပြောင်းအလုပ်သမားများ ဦးစီးသည့် မြန်မာဖွံ့ဖြိုးတိုးတက်ရေး ဖောင်ဒေးရှင်း (MDF) က ရွှေ့ပြောင်းအလုပ်သမားများအတွက် ထိုင်းနိုင်ငံ၊ ပဒုံဌာနီခရိုင်၊ လန်စစ်ရှိ တလဆူချဈေးအနီးတွင် ယမန်နေ့က ကျောင်းတကျောင်း ဖွင့်လှစ်လိုက်သည်။

အဆိုပါကျောင်းတွင် အင်္ဂလိပ်စာ၊ ထိုင်းစာနှင့် ကွန်ပျူတာ သင်တန်းများ သင်ကြားပို့ချပေးမည်ဖြစ်ပြီး ထိုင်းတက္ကသိုလ်များဖြစ်သော ချုလာလောင်ကွန်း၊ တမ္မာဆတ်၊ မဟီဒေါ၊ ကဆတ်ဆ၊ ABAC၊ ဘန်ကောက်၊ ရမ်ကန်ဟမ်၊ ရန်စစ်၊ စိန့်ဂျွန်တက္ကသိုလ်တို့မှ မြန်မာကျောင်းသားကျောင်းသူများ ဦးဆောင်ဖွဲ့စည်းထားသော မြန်မာဖွံ့ဖြိုးတိုးတက်ရေး ဖောင်ဒေးရှင်း (MDF) က ကျောင်းကို ဖွင့်လှစ်လိုက်ခြင်းဖြစ်သည်။

ထိုသင်တန်းကျောင်း၌ စနေ၊ တနင်္ဂနွေ (၂) ရက်တွင် ပညာရေးအတွက် ဖွင့်လှစ်မည်ဖြစ်ပြီး တနင်္လာမှ သောကြာနေ့အတွင်း ကျန်းမာရေး ပညာပေးအစီအစဉ်နှင့် ကျန်းမာရေးအတိုင်ပင်ခံ ဌာနအဖြစ် ဖွင့်လှစ်ဆောင်ရွက်သွားမည်ဖြစ်သည်။ ကျောင်းသားကျောင်းသူများ၏ သွားလာမှုလုံခြုံရေးအတွက် သင်တန်းသားလက်မှတ်များ ထုတ်ပေးထားကာ သက်ဆိုင်ရာ ရဲစခန်းအား အသိပေးထားသည်ဟု သိရသည်။

ကျောင်းဖွင့်လှစ်ခြင်းနှင့်ပတ်သက်၍ MDF ၏ ဒါရိုက်တာ မသူဇာက “ကျမတို့အဖွဲ့အစည်းကို ၂၀၀၈ ခုနှစ်ကတည်းက စတင်ဖွဲ့စည်းခဲ့တာပါ။ ပထမပိုင်းနှစ်တွေမှာတော့ ကျန်းမာရေး အကူအညီပေးမှုတွေကို ရန်စစ်တို့ စမုတ်ပရာကန် ပါ့က်နမ်းတို့မှာ လုပ်ခဲ့ပါတယ်။ အခုကတော့ ပညာရေးအစီအစဉ်ရဲ့ ပထမခြေလှမ်းပါ။ (၃) လသင်တန်းအတွက် ကျောင်းသားတယောက်ကို ဘတ် (၃၀၀) ကျောင်းဝင်ကြေး ထည့်ဝင်ခိုင်းပါတယ်။ ကွန်ပျူတာအတွက်ကျတော့ ဘတ် (၅၀၀) ပါ။ ကျောင်းစဖွင့်တယ် ဆိုပေမယ့် နောက်ထပ် (၂) ပတ် ကျောင်းလက်ခံပါဦးမယ်” ဟု ဆိုသည်။

ယခုစဖွင့်သည့် ပထမအပတ်တွင် ကျောင်းသား ကျောင်းသူပေါင်း (၅၀) ကျော် လာရောက် စာရင်းသွင်း သင်ကြား နေပြီဖြစ်သည်။ ဆရာဆရာမများအဖြစ် တက္ကသိုလ်များတွင် ပညာသင်ကြားနေသော၊ ဘွဲ့ရပြီးသော သူများက တာဝန်ယူ သင်ကြားပေးမည်ဖြစ်ပြီး ထိုင်းဘာသာရပ်အတွက် ထိုင်းဘာသာစကား တတ်ကျွမ်းသော ထိုင်းကရင်၊ ထိုင်းရှမ်းများက သင်ကြားပေးမည်ဖြစ်သည်။

“ပညာမတတ်သေးတဲ့သူတွေကို၊ ပညာတတ်ပြီးသားသူတွေက ဖြန့်ဖြူးပေးနိုင်အောင်၊ တတ်ပြီးသားသူတွေအတွက်လည်း ပိုမိုကျယ်ကျယ်ပြန့်ပြန့် လေ့လာခွင့်ရအောင်ပါ” ဟု MDF ကျောင်းဖွင့်ရသည့် ရည်ရွယ်ချက်ကို မသူဇာက ရှင်းပြသည်။

ထိုင်းနိုင်ငံ ဘန်ကောက်မြို့တော် အနီးတဝိုက်တွင် မြန်မာရွှေ့ပြောင်းအလုပ်သမား (၂) သိန်းကျော်ရှိသည်ဟု ထိုင်းအစိုးရ အလုပ်သမားဝန်ကြီးဌာန၏ စာရင်းဇယားများအရ သိရှိရပြီး ယခုကဲ့သို့ တနိုင်တပိုင်စာသင်ကျောင်းများ ဖွင့်လှစ်လာခြင်းကြောင့် ရွှေ့ပြောင်းအလုပ်သမားများ၏ ဘဝတိုးတက်မှုအတွက် တစုံတရာ အထောက်အကူပြုကြောင်း ရွှေ့ပြောင်းအလုပ်သမားများက ပြောကြားသည်။