မြန်မာနိုင်ငံသား စိစစ်ရေးကဒ်မရှိလည်း ယာယီနိုင်ငံကူးလက်မှတ်လုပ်ရန်လွယ်ကူ

Thursday, 24 June 2010 08:11 သျှမ်းသံတော်ဆင့်

ရွှေ့ပြောင်းအလုပ်သမားများ နအဖ ထုတ်ပေးသည့် နိုင်ငံသားစိစစ်ရေးကဒ်ပြားမရှိသော်လည်း မြန်မာ နှင့် ထိုင်းအစိုးရ ပူးပေါင်းအကောင်အထည်ဖေါ်သည့် ယာယီနိုင်ငံကူးလက်မှတ် လုပ်ရန်အခက်အခဲမရှိကြောင်း သျှမ်းရွှေ့ပြောင်းအလုပ် သမားတဦးက ပြောပါသည်။

“မနေ့က တာချီလိတ်မှာ ကျနော်တို့ ယာယီနိုင်ငံကူးလက်မှတ်သွားလုပ်ကြတယ်၊ မှတ်ပုံတင်မရှိလဲ ရတယ်၊ အကုန် အကျ တော့များတယ်၊ အားလုံးအပြီးအစီး ၆၅၃၅ ဘတ်။ ကျနော်တို့လို ကျဘမ်းအလုပ်သမားအတွက် မနည်းဘူးလေဗျာ။ ” - ယမန်နေ့က တာချီလိတ်သို့ ယာယီနိုင်ငံကူးလက်မှတ်ပြန်လုပ်သူတဦးက ပြောပါသည်။
ယာယီနိုင်ငံကူးလက်မှတ်စီမံကိန်းတွင် နိုင်ငံသားစိစစ်ရေးကဒ်ပြားမရှိသူများ၏ အနာဂတ်အတွက် စိုးရိမ်ရသော်လည်း ထိုင်းနိုင်ငံ ချင်းမိုင်မှ နေ့ချင်းပြန် သွားလုပ်နိုင်ကြောင်း ပြောပြပါသည်။

“ကျနော်တို့ကို ထိုင်းကပွဲစားတွေကခေါ်သွားတာလေ။ သူတို့အကျိုးဆောင်မလုပ်ပေးရင်ဘယ်လွယ်မလဲ။ ဗမာ ဘက်ခြမ်းက ပွဲစားတွေနဲ့ ထိုင်းဘက်ခြမ်းက ပွဲစားတွေ ပူးပေါင်းပြီးလုပ်တာ။ ကုန်ကျစရိတ်တော့များတယ်။ ယာ ယီနိုင်ငံကူးလက်မှတ်လုပ်ပြီးခြင်း ၂၄ နာရီအတွင်း ထိုင်းလူဝင်မှုကြီးကြပ်ရေးကိုအကြောင်းကြားရတယ်။ ထိုင်း အလုပ်သမားဌာနကိုတော့ အလုပ်ရှင်နဲ့အတူသွားရင် ပိုလွယ်တယ်။” - ဟု ဆက်ပြော၏။

ယာယီနိုင်ငံကူးလက်မှတ်လုပ်ရန် မှတ်ပုံတင်မရှိသူများအတွက် မိဘဘိုးဘွားနာမည် ခုနှစ်ဆက်ပြောပြရကြောင်း၊ ဘီ၊ ဘင်တို့၏ နာမည်မသိသူများအတွက် စိတ်အနှောင့်အယှက်ဖြစ်မိကြောင်း၊ သို့သော်တရက်တည်းဖြင့် အပြီး လုပ်နိုင်သဖြင့် ထင်သလောက်ပင်ပန်းခြင်းမရှိကြောင်းပြောပါသည်။
တရားဝင်အလုပ်သမားဖြစ်ရေးအတွက် ထိုင်း-မြန်မာ နှစ်နိုင်ငံပူးပေါင်းသည့်စီမံကိန်းတွင် (လက်ရှိပေါက်ဈေးအရ) ယာယီနိုင်ငံကူးလက်မှတ် (ထိုင်းအကျိုးဆောင်ကုမ္ပဏီထံပေးရသည့်ငွေ) ဘတ်ငွေ ၄၆၅၀၊ ထိုင်းအလုပ်သမား ရေးရာဌန ဘတ်ငွေ ၁၄၅၀၊ မှတ်ပုံတင်ကြေး (မြန်မာမှတ်ပုံတင်မရှိသည့်သူ) ဘတ် ၃၇၀၊ စာအုပ် (ယာယီနိုင်ငံ ကူးလက်မှတ်) ကြေး ၆၅ ဘတ်၊ စုစုပေါင်း ၆၅၃၅ ဘတ် ကုန်ကျ ကြောင်းသိရပါသည်။

“အနာဂတ် ဘယ်လိုဖြစ်လာမလဲတော့မသိဘူး၊ မြန်မာဘက်က အလုပ်သမားတွေရဲ့ ၀င်ငွေခွန် ထပ်ကောက်ဦး မလား မသိဘူး၊ ဒါပေမယ့် ယာဉ်မောင်းလိုင်စင်တွေ၊ မော်တော်ယာဉ်ပိုင်ဆိုင်တဲ့အခွင့်အရေးတွေရတယ်ဆိုတော့ မဆိုးဘူးပေါ့၊”- ဟု ယာယီနိုင်ငံကူးလက်မှတ်ကိုင်ဆောင်ထားသူ ဆောက်လုပ်ရေးအလုပ်သမား ကျိုင်းတုံသား စိုင်းလုံကျောက် ကပြောပါသည်။

“အရင်က ကျနော်တို့ ထိုင်းထဲကို ခိုးဝင်အလုပ်လုပ်တဲ့သူခိုးတွေ၊ အခုတော့ကိုယ်ပိုင်နံပါတ်တွေနဲ့ တရားဝင်နယ် စပ်ဂိတ်ကို ခေါင်းမော့ရင်ကော့ပြီးဖြတ်သန်းတယ်။ ထိုင်းထဲမှာလည်း ဘယ်သူကိုကြောက်စရာမလိုတော့ဘူး၊ ဥပဒေနဲ့ လွတ်ကင်းရင်ပြောတာနော်” - ဟု သျှမ်းပြည်သား ကရင်အမျိုးသားတဦးကလည်း သျှမ်းသံတော်ဆင့် သို့ပြောပြပါသည်။ ထိုင်း - မြန်မာပူးပေါင်းအကောင်အထည်ဖေါ်သည့် စီမံကိန်း၌ ယာယီနိုင်ငံကူးလက်မှတ်ကိုင်ဆောင်ထားသူတိုင်း ထိုင်းနိုင်ငံအတွင်း အလုပ်လုပ်ခွင့်သုံးနှစ်ဆက်တိုက်ရရှိမည်ဖြစ်ပြီး၊ သတ်မှတ်ချိန်ပြည့်လွန်ပါက မိမိနေရပ်/ တိုင်းပြည် သို့ သုံးနှစ်ပြန်နေရမည်ဖြစ်သည်။

ယာယီနိုင်ငံကူးလက်မှတ်လုပ်ရန်အတွက် နအဖက တာချီလိတ်၊ မြ၀တီ၊ ကော့သောင်းမြို့တို့တွင် ရုံးဖွင့်လှစ် ပေးထားပြီး တရက်လျှင် အလုပ်သမား ၂၀၀ ခန့် ယာယီနိုင်ငံကူးလက်မှတ်ထုတ်ပေးလျက်ရှိသည်။ ထိုင်းနိုင်ငံ အတွင်း မြန်မာအလုပ် သမား ၁.၁ သန်း တရားဝင်အလုပ်လုပ်နိုင်ရေးအတွက် - ၂၀၁၂ ခုနှစ်အထိ စီမံကိန်းချလုပ်ဆောင်ပေးသွားမည် ဟု သိရသည်။

မတရား စေခိုင်းခံရသည့် မြန်မာ အလုပ်သမားများကို ကယ်ထုတ်

ဘစောတင် Wednesday,June 23, 2010

ထိုင်းနိုင်ငံ ဘန်ကောက် မြို့လယ်ရှိ ဒဲန်းဒဲအရပ်မှ စက်ချုပ်ရုံငယ် တခုအတွင်း မတရား အလုပ်စေခိုင်း ခံရပြီး လှောင်ပိတ် ခံထားရသည့် မြန်မာ အလုပ်သမားများ ထဲမှ ၆ ဦးကို ရောင်ခြည်ဦး အလုပ်သမား အဖွဲ့ (ဘန်ကောက်) က ကူညီ ကယ်ထုတ် နိုင်သောကြောင့် ထွက်ပြေး လွတ်မြောက် ခဲ့ကြောင်း သတင်းရရှိသည်။

စက်ရုံမှ လွတ်မြောက် ခဲ့သူများ၏ ဆွေမျိုးများက ရောင်ခြည်ဦးကို ဖုန်းဆက် အကြောင်းကြား လာသောကြောင့် သွားရောက် ကယ်ထုတ် ပေးခဲ့ရကြောင်း၊ ပထမ အကြိမ်တွင် အဆင်မပြေဘဲ ယခုလ ၁၁ ရက်နေ့ကမှ ကယ်ထုတ် ပေးနိုင်ခဲ့ကြောင်း အလုပ်သမားများ လွတ်မြောက်ရန် ကိုယ်တိုင်ပါဝင် ကူညီခဲ့သူ ရောင်ခြည်ဦး အဖွဲ့သား တဦးက ပြောပြသည်။
“ပထမ တခေါက်မှာ ကျနော်တို့ တက္ကစီနဲ့ သွားတော့ သူဌေးလူယုံတွေ မလစ်တာနဲ့ သူတို့ ထွက်လာလို့ မရဘူး။ သူဌေးက သူတို့ကို အမြဲတမ်း စောင့်ကြည့် ခိုင်းထားတာ။ ဒုတိယအကြိမ် သွားခိုးထုတ်မှပဲ ရလာတယ်” ဟု ရောင်ခြည်ဦး (ဘန်ကောက်) ရုံးတာဝန်ခံ ကိုစောဂျက်က ဧရာဝတီသို့ ပြောသည်။

အဆိုပါ စက်ရုံတွင် အလုပ် လုပ်နေသူများမှာ ပြင်ပသို့ သွားခွင့်မရှိဘဲ ပစ္စည်းဝယ်ချင်ပါက စက်ရုံ အလုပ်သမား ခေါင်းမှ တဆင့် ၀ယ်ယူရပြီး မလွှဲမရှောင်သာ အပြင်သို့ ထွက်ရလျှင်လည်း သူဌေး လူယုံနှင့်သာ သွားခွင့်ရကြောင်း သိရသည်။

ရောင်ခြည်ဦး အဖွဲ့သားများသည် အဆိုပါ စက်ရုံမှ မချမ်းမြေ့ (လွိုင်ကော်)၊ မလဲ့လဲ့ (ရန်ကုန်)၊ ကိုစံလင်းအောင်၊ မဇင်မာ၊ မဖြူထွန်းနှင့် ကိုတိမ်တိုက် တို့ကို ခိုးထုတ် ကယ်တင် နိုင်ခဲ့သည်။

လွတ်မြောက် လာသူထဲမှ မချမ်းမြေ့၏ ပြောပြချက်အရ အဆိုပါ စက်ရုံတွင် အလုပ် လုပ်နေသော သူငယ်ချင်း တဦး ခေါ်သောကြောင့် မဲဆောက်မှနေ၍ သူဌေး စားရိတ်ဖြင့် တက်လာခြင်း ဖြစ်ကြောင်း၊ တရက်လျှင် ဘတ် ၇၅၀ (ကျပ် ၂၂၀၀ ခန့်) ရမည်ဟု သူငယ်ချင်းက ပြောခဲ့ကြောင်း သိရသည်။

သို့ရာတွင် ၎င်း အလုပ်စဝင်စဉ် တနေ့ ဘတ် ၆၀၊ ၇၀ (ကျပ် ၂၁၀၀ ခန့်) သာ ရကြောင်း၊ နေ့စဉ် ည ၂ နာရီ၊ ၃ နာရီခန့် အထိ အလုပ် လုပ်ရကြောင်း။ နံနက် ၉ နာရီ အလုပ် ပြန်ဝင်ရ ကြောင်းလည်း မချမ်းမြေ့က ပြောပြသည်။

“ဟင်းဝယ် စားတာက တနေ့ကို ၄၀ လောက်ကုန်တယ်။ ညဥ့်လည်း အရမ်းနက်တယ်။ ကျမ အဲဒီမှာ ၃၅ ရက် ကြာခဲ့တယ်။ တနေ့ကို ၇၅၀ မပေးနဲ့ဦး၊ ၂၀၀ လောက် ရရင်တောင် ကျမတို့ ထွက်မပြေးပါဘူး” ဟု သူက ဆိုသည်။

ယခုကဲ့သို့ မချမ်းမြေ့ ထွက်ပြေး လာခဲ့သည့် အတွက် ၎င်းကို ခေါ်ယူခဲ့သည့် အဆိုပါ စက်ရုံတွင် အလုပ် လုပ်နေဆဲ ဖြစ်သော သူငယ်ချင်း ဖြစ်သူက အလျော် ပေးရမည် ဖြစ်ကြောင်း မချမ်းမြေ့က ပြောသည်။

အဆိုပါ စက်ရုံ ပိုင်ရှင်သည် အလုပ်သမား ၆ ဦး ထွက်ပြေး ခဲ့ပြီးနောက် ကျန်ရှိသူများကို ပိုမို တင်းကျပ်ကာ သော့ခတ် ပိတ်လှောင် ထားသည်ဟု လွတ်မြောက် လာသူထဲမှ မလဲ့လဲ့က ရှင်းပြသည်။

ယင်းအမှုနှင့် စပ်လျဉ်း၍ ရောင်ခြည်ဦး (ဘန်ကောက်) မှတ်တမ်းတွင် “အလုပ်သမား များအား နံနက် ၉း၀၀ မှ စတင် ခိုင်းစေပြီး နောက်တနေ့ နံနက် ၃း၀၀ နာရီ အထိ အလုပ် လုပ်ခိုင်းသည်။ အလုပ်များအား ပုတ်ပြတ် လုပ်ကိုင်ခိုင်းပြီး စုစုပေါင်း တနေ့ အလုပ်ချိန် ၁၈ နာရီ ခိုင်းစေ သော်လည်း တနေ့လျှင် ဘတ် ၆၀ မှ ၈၀ (ကျပ် ၁၈၀၀ မှ ကျပ် ၂၄၀၀) အတွင်းသာ ရရှိကြသည်။ ၁၅ ရက် တခါ ဘတ်ငွေ ၇၅၀ ထုတ်ပေးပြီး တခြား လုပ်အားခ ငွေများ ထုတ်ပေးခြင်း မရှိ။ ကယ်ရီစရိတ် မကြေသေး သူများကို ကယ်ရီစရိတ် ဖြတ်နေခြင်း ဖြစ်ကြောင်း ပြောဆိုပြီး ကယ်ရီ စရိတ်ကြေ (အကြွေး ကြေသူများ) သူများထံမှ အာမခံကြေး ဘတ် ၄၀၀၀ (ကျပ် ၁၂၀၀၀၀ ခန့်) အထိ ဖြတ်ယူမည် ဖြစ်ကြောင်း ပြောဆိုသည်” ဟု ရေးသား ထားသည်။

ဇွန်လ ၁၁ ရက်နေ့တွင် အလုပ်ရှင်၏ မတရား ခေါင်းပုံဖြတ်မှုကို မခံနိုင်သော အလုပ်သမား ၆ ဦး ထွတ်ပြေး လွတ်မြောက်ခဲ့ရာ ၎င်း အလုပ်သမားတို့၏ ဓာတ်ပုံများကို ပတ်ဝန်းကျင်တွင် ဖြန့်ဝေပြီး ရှာဖွေ သတင်းပေး နိုင်သူများအား ဘတ် ၁၀၀၀၀ (ကျပ် ၃ သိန်းခန့်)၊ လာရောက် ခိုးထုတ်သူကို ရှာဖွေ သတင်းပေး နိုင်သူအား ဘတ် ၁၀၀၀၀ (ကျပ် ၃ သိန်းခန့်) ပေးမည့်ဟု ဆုငွေ ထုတ်ထားကြောင်း၊ ဆိုင်ကယ် ကယ်ရီသမားများ၊ တက္ကစီ ယာဉ်မောင်းများ အပြင် ဘန်ကောက် နယ်မြေ ကျွမ်းကျင်သော မြန်မာ အလုပ်သမားများ ကိုလည်း ၀ိုင်းဝန်း ရှာဖွေပေးရန် အကူအညီ တောင်းထားကြောင်း ရောင်ခြည်ဦး၏ မှတ်တမ်းဖိုင်တွင် ရေးသားထားသည်။

ယင်းသို့ ကူညီကာ ခိုးထုတ် ကယ်တင်ခဲ့သော ရောင်ခြည်ဦး (ဘန်ကောက်) အဖွဲ့ မှ တာဝန်ရှိသူ များကို တွေ့လိုကြောင်းကို အဆိုပါ စက်ရုံမှ စကားပြန် ကိုကောင်းမြတ်က အကြောင်းကြားလာ သဖြင့် ရောင်ခြည်ဦး (ဘန်ကောက်) နှင့်အတူ ဘန်ကောက် အခြေစိုက် မြန်မာ့အရေး ဆောင်ရွက်သော အဖွဲ့များ ပူးပေါင်းကာ သွားရောက် တွေ့ဆုံရန် စီစဉ်နေ ကြကြောင်း သိရသည်။

စက်ရုံပိုင်ရှင်မှာ မြန်မာနိုင်ငံသား ရှမ်းတရုတ် လူမျိုး ဖြစ်ပြီး မြန်မာခရီးသွား လက်မှတ် ကိုင်ဆောင်သူဟု သိရသည်။ သူ၏ ဇနီးမှာ ချင်းမိုင်မြို့သူ ထိုင်းနိုင်ငံသား ဖြစ်သည်။ အလုပ်သမား အားလုံးက ၎င်းတို့ကို အစ်ကိုနှင့် အစ်မ ဟူ၍ ခေါ်ဝေါ်ကြသဖြင့် ၎င်းတို့ အမည်များကို မသိကြပေ။

အဆိုပါ စက်ရုံသည် ဘန်ကောက် မြို့လယ် ဒင်းဒဲအရပ်မှ PM tower နှင့် ဟွေ့ ခွန် ဈေးအနီးတွင် ရှိသည်။

မလေးရှားက တရားမ၀င် မြန်မာအလုပ်သမားများကို ပြန်ပို့ ၊ မြန်မာ့ရွှေဈေးတက်

ရွှေအောင် ၂၃ ဇွန် ၂၀၁၀

မလေးရှားက မြန်မာအလုပ်သမားတွေ အဲအေးရှား အထူးလေ ယာဉ်နဲ့ မြန်မာပြည်ကို ပြန်ပို့ဖို့လုပ်နေပြီး မြန်မာ့ရွှေဈေးတွေလည်း ဆက်တက်နေ တုန်း ဖြစ်ပါတယ်။ မလေးရှားမှာ (Over Stay)အိုဗာစတေးနဲ့ နေထိုင်လုပ်ကိုင်နေတဲ့ မြန်မာ အလုပ်သမားတွေကို အခုရက်ပိုင်းအတွင်းမှာ ဖမ်းပြီး အဲအေးရှားအထူးလေယာဉ်နဲ့ ပြန်လွှတ်ဖို့ လုပ်နေတယ်လို့ မလေးရှား အန်အယ်လ်ဒီအယ်လ်အေဥက္ကဋ္ဌ ကိုကျော်ကျော်က ပြောပါတယ်။

  “ဒီလထဲမှာ နောက်ထပ် စီမံချက် တခုလုပ်လိုက်တာက အဲအေးရှား ကနေ ပြီးတော့ သူ့ရဲ့ အရောင်းမြှင့်တင်ဖို့အတွက် မလေးရှားအစိုးရရယ်၊ ကမ္ဘာ့လွတ်ငြိမ်း ချမ်းသာအဖွဲ့ကြီးကနေပြီးတော့ ဒါကို တောင်းဆို လိုက်တာပေါ့နော်။ ဒီမှာ ဒုက္ခ ရောက်နေတဲ့ နိုင်ငံခြားသား အလုပ်သမားတွေကို ဘာကြောင့် ပြန်လို့ မရတာလဲ ဆိုတော့ လေယာဉ်စရိတ် ဈေးကြီးတာရယ်၊ တရားဝင် ပြန်ခွင့် မရှိတာရယ်ပေါ့။”

“ဒါကြောင့် ဈေးနှုန်းချိုချိုသာသာနဲ့ ပြန်ခွင့်ပေးမယ်ဆိုရင် သူတို့အတွက် သက်သာမယ် ဆိုပြီး အဲဒီလိုတောင်းဆိုလိုက်တော့ ဒီနိုင်ငံအစိုးရကလည်း ဟိုးအရင် ကတည်းက သူတို့ချထားတဲ့ စီမံချက်က နိုင်ငံခြားသားလျှော့ချရေးဆိုတဲ့ စီမံချက်နဲ့ လုပ်ဆောင်တဲ့အခါမှာ ဒီမှာ ရှိတဲ့ နိုင်ငံခြားသား နှိမ်နင်းရေးအဖွဲ့ရယ်၊ ရဲဌာနရယ်၊ လ၀ကရယ်၊ သုံးယောက်ပေါင်းပြီးတော့ ဒီမှာ တရားမ၀င် အိုဗာစတေး ဖြစ်နေတဲ့ နိုင်ငံခြားသား အလုပ်သမားတွေကို ဖမ်းဆီးပြီး အခုအချိန်ကစပြီးတော့ အပေါ်လမ်းက နေ ပြန်ပို့နေတာပေါ့နော်။”

အထူးသဖြင့် စနေ၊ တနင်္ဂနွေနေ့တွေမှာ မြန်မာအလုပ်သမားတွေ ထိုင်လေ့ ရှိတဲ့ စားသောက်ဆိုင်တွေမှာ ၀င်ဖမ်းတယ်လို့လည်း ဆိုပါတယ်။ ပတ်စပို့နဲ့ တရားဝင်လာပြီး အလုပ်လုပ်နေသူတွေကတော့ သူတို့ကိုခေါ်တဲ့ အေးဂျင့်နဲ့ အလုပ်လုပ်တဲ့ နေရာမှန်ရင် အရေးမယူပါဘူး၊ အလုပ်နေရာ ပြတာက တနေရာ အလုပ်လုပ်တာက တနေရာဆိုရင်တော့ ဖမ်းတယ်လို့လည်း ဆိုပါတယ်။ မြန်မာပြည်ကနေ အလုပ်သမား စေလွှတ်တဲ့ အေဂျင်စီတခုရဲ့ အဆိုအရ နိုင်ငံခြားထွက် အလုပ်လုပ်တဲ့ မြန်မာအလုပ်သမား ၇၀ ရာခိုင်နှုန်းက မလေးရှား သွားကြတယ်လို့ ပြောပါတယ်။

အခုစီမံချက်မှာ မြန်မာတွေတင် ဖမ်းတာ မဟုတ်ပါဘူး။ အင်ဒိုနီးရှား စတဲ့ နိုင်ငံခြားသား အလုပ်သမားတွေအားလုံးကို ဖမ်းနေတာပါ၊ အဲအေးရှားလေကြောင်း လိုင်းရဲ့ ၀က်ဘ်ဆိုဒ်မှာ ထုတ်ပြန်ထားချက်အရ ရန်ကုန်-ကွာလမ်လာပူ တကြောင်း သွားကို မလေးရင်းဂစ် ၂၉ ကျပ်တသောင်းလောက်နဲ့ ပြေးဆွဲမယ်၊ ခရီးစဉ်ကို ဇူလိုင် လ ၂၀ ကနေ ၂၀၁၁ ခုနှစ် မေလ ၈ ရက်အထိ ပြေးပေးမယ်လို့ သိရပါတယ်။

တရိပ်ရိပ်တက်နေတဲ့မြန်မာ့ရွှေဈေးက ဒီနေ့လဲ အမြင့်ဈေးမှာရှိနေတုန်းပါ။ ရန်ကုန်အခေါက်ရွှေဈေးက တကျပ်သား ခြောက်သိန်းငါးသောင်းလေးထောင်ပါ၊ ကမ္ဘာ့ရွှေဈေးတက်လို့ မြန်မာ့ရွှေဈေးလည်း လိုက်တက်တာလို့ ရွှေဆိုင်ပိုင်ရှင်တဦး က ပြောပါတယ်၊ ပြီးခဲ့တဲ့ မေလလယ်ပိုင်းကစပြီး ရွှေဈေးက ခြောက်သိန်းလေးသောင်း အထိ တက်ခဲ့ပြီး၊ ရွှေဈေးသမိုင်းတလျှောက် အမြင့်ဆုံးစံချိန် ရောက်ခဲ့ပါတယ်၊ အခုဇွန်လ နှောင်းပိုင်း အရောက်မှာလည်း ခြောက်သိန်းငါးသောင်းအထက်မှာပဲ စံချိန်တင် ရှိနေ တာ ဖြစ်ပါတယ်။