ရနောင်းမြို့တွင် ယာယီနိုင်ငံကူး လက်မှတ် ရုံးသစ် ဖွင့်

ဘစောတင် Saturday, July 03, 2010(ဧရာဝတီ)
ထိုင်းနိုင်ငံရှိ မြန်မာ အလုပ်သမားများ အတွက် ယာယီနိုင်ငံကူး လက်မှတ် ပြုလုပ်ပေးရန် ရုံး တရုံးကို ဇူလိုင်လ ၁ ရက် နေ့မှ စတင်ကာ မြန်မာ အာဏာပိုင်များက ရနောင်းမြို့တွင် ဖွင့်လှစ် လိုက်ကြောင်း သတင်းရရှိသည်။

ထိုင်း နိုင်ငံ ရနောင်းမြို့တွင် ဖွင့်လှစ်လိုက်သော ယာယီနိုင်ငံကူးလက်မှတ် ရုံး ဆိုင်းဘုတ်ကို တွေ့ရစဉ် (ဓာတ်ပုံ - ဧရာဝတီ)ပြီးခဲ့သည့် ဇွန်လဆန်းက ရနောင်းမြို့ တွင် ထိုင်းနှင့် မြန်မာ ၂ နိုင်ငံမှ တာဝန်ရှိသူများ တွေ့ ဆုံကာ ထိုင်းနိုင်ငံ အတွင်း ယာယီနိုင်ငံကူး လက်မှတ်ရုံး ဖွင့်လှစ်ရန် အသေးစိပ် ဆွေးနွေးခဲ့ ကြကြောင်း၊ ထို့နောက် သဘောတူညီမှု ရရှိခဲ့ပြီး ယခု ကဲ့သို့ ဖွင့်လှစ်ခြင်း ဖြစ်ကြောင်း အခြေခံ အလုပ်သမား အခွင့်အရေး ပညာပေးဌာန (GHRE) မှ ရွှေ့ပြောင်း အလုပ်သမား အရေး တာဝန်ယူ ဆောင်ရွက် နေသူ တဦးက ပြောသည်။

“ပြီးခဲ့တဲ့လက အစည်း အဝေးကို ထိုင်းက အလုပ်သမား ဒု ၀န်ကြီး လာတယ်။ မြန်မာသံရုံးက သံမှူးလာတယ်။ ရနောင်း မြို့ နယ် မှူးတွေ တက်ရောက်ပြီး ဇူလိုင်လ ၁ ရက်နေ့မှာ ဖွင့်ဖို့ သဘောတူခဲ့ ကြတယ်။ ဒါပေမယ့် ပတ်စ်ပို့စ်တော့ စ မလုပ် ပေးနိုင် သေးဘူးတဲ့။ ဘာလို့လဲ ဆိုတော့ သူတို့မှာ ကွန်ပျူတာတွေ လူတွေ မစုံသေး ဘူးလို့ သိရတယ်” ဟု GHRE မှ အလုပ်သမားရေးရာ တာဝန်ခံ ကိုမိုးဝေက ဧရာဝတီသို့ပြောသည်။

ရနောင်းတွင် ဖွင့်လှစ်သောရုံးသည် ဇူလိုင်လ ၁ ရက်နေ့မှ စက်တင်ဘာလ ၃၀ ရက်နေ့အထိ ၃ လသာ တည်ရှိမည်ဟု လည်း သိရသည်။

ဤရုံးကို ဖွင့်လှစ်ရခြင်းမှာ ရနောင်းနှင့် ကော့သောင်းကြား၌ ပင်လယ်ခံနေသောကြောင့် မိုးရာသီတွင် ယာယီနိုင်ငံကူး လက်မှတ် လုပ်သူများအတွက် အန္တရာယ်ဖြစ်မည်ကို စိုးရိမ်သောကြောင့်ဟု သိရကြောင်း ရနောင်းမြို့ မှ မြန်မာကျောင်း ဆရာ တဦးက ဆိုသည်။

“မိုးတွင်းဆိုတော့ လှိုင်းလေကြီးတယ်။ ဟိုဘက်ကမ်းကိုသွားရတာက အန္တရာယ်လည်းများတယ်လေ။ ဒါကြောင့် ၂ နိုင်ငံ တာဝန်ရှိသူတွေ ညှိနှိုင်းပြီးတော့ ထိုင်းဘက်မှာ လာဖွင့်တာလို့ ကျနော်တို့ ကြားသိရတယ်”ဟု ကျောင်းဆရာ ဆရာဌေးက ပြောသည်။

၂၀၀၉ ခုနှစ်မှ စတင်ကာ ယာယီနိုင်ငံကူးလက်မှတ်ကို ထုတ်ပေးနေခဲ့ရာ ယခင်က မြန်မာနိုင်ငံဘက်ခြမ်း ကော့သောင်း မြို့ ၊ မြ၀တီမြို့ နှင့် တာချီလိတ်မြို့ များတွင် ရုံးများဖွင့်လှစ်ပြီး ဆောင်ရွက်ပေးခဲ့သည်။ ယခုရုံးသည် ကော့သောင်းမြို့ မှ ရနောင်းဘက်ခြမ်းသို့ ရွှေ့ ပြောင်းဖွင့်လှစ်ပေးသည့် ရုံးဖြစ်သည်။

မြန်မာနိုင်ငံသား ရွှေ့ ပြောင်းအလုပ်သမား ၁ သန်းကျော်သည် ထိုင်းအလုပ်သမား ၀န်ကြီးဌာနတွင် မှတ်ပုံတင်ထား ကြောင်း၊ ယင်းတို့ အထဲမှ ပြီးခဲ့သည့် မေလ ၂၆ ရက်နေ့အထိ အလုပ်သမား ၉၀၉၁၈ ဦး ယာယီနိုင်ငံကူးလက်မှတ် ပြုလုပ်ပြီးစီးကြောင်း အာဏာပိုင်များ၏ ထုတ်ပြန်ချက်များအရ သိရသည်။

ထိုင်း နိုင်ငံအတွင်း ယာယီနိုင်ငံကူး လက်မှတ်ရုံးကို ဖွင့်လှစ်ပေးခြင်းအတွက် အလုပ်သမားများက သဘောကျကြောင်း ဘန်ကောက်မြို့အနီးရှိ မဟာချိုင်မှ အလုပ်သမားတဦးက ဆိုသည်။