လူကုန်ကူးမှု တိုက်ဖျက်ရေး သီချင်း FM များတွင် ထုတ်လွှင့်ရန် စီစဉ်နေ

.ဆလိုင်းဟံသာစန်း | ကြာသပတေးနေ့၊ ဒီဇင်ဘာလ ၂၄ ရက် ၂၀၀၉ ခုနှစ် ၂၀ နာရီ ၄၅ မိနစ် နယူးဒေလီ (မဇ္ဈိမ)။ ။ မြန်မာနိုင်ငံတွင် လူကုန်ကူးမှု တိုက်ဖျက်ရေး ပညာပေး သီချင်းကို ပြည်တွင်း FM လိုင်းများ၌ လာမည့် နှစ်ဆန်းတွင် ထုတ်လွှင့်ရန် စီစဉ်နေကြောင်း ရန်ကုန်ရှိ မဲခေါင်မြစ်ဝှမ်း လူကုန်ကူးမှု တိုက်ဖျက်ရေးအဖွဲ့ UNIAP က ယနေ့ ပြောသည်။

“လူကုန်ကူးမှု တိုက်ဖျက်ရေးအတွက် သီချင်းတပုဒ် စီစဉ်နေပါတယ်။ တေးရေး သြရသနဲ့ ပူးပေါင်း စီစဉ်နေတာပါ။ လူကုန်ကူးမှု တိုက်ဖျက်တာက တခြားဟာနဲ့ မတူဘူး။ ဒါက ပြစ်မှုဆိုတော့ ပြည်ထဲရေး ဝန်ကြီးဌာနနဲ့ ကျနော်တို့ အမြဲ ပူးပေါင်း ဆောင်ရွက်နေပါတယ်” ဟု ကုလသမဂ္ဂ လက်အောက်ခံ UNIAP မှ တာဝန်ရှိသူ တဦးက မဇ္ဈိမကို ပြောသည်။

.'မေတ္တာမီးအိမ်' အမည်ရ သီချင်းကို တေးရေးသြရသက ရေးစပ်ပြီး ဟန်ထွန်း၊ ချမ်းချမ်း၊ ဇေယျ၊ မီနိုး၊ သြရသနှင့် နေနေ စသည့် တေးသံရှင်များက သီဆိုထားသည်။

ထို့ပြင် သီချင်းကို MTV အဖြစ် ဇေယျက ဒါရိုက်တာအဖြစ် တာဝန်ယူ ရိုက်ကူးလျက် ရှိသည်။ MTV ကို လေဆိပ်၊ ဘူတာရုံ၊ အဝေးပြေးကား ရပ်နားရေး စခန်းများနှင့် အခြား လူစည်ကားရာ နေရာများတွင် လာမည့် ဇန်နဝါရီလအတွင်း ပြသနိုင်ရန် ရည်ရွယ်ထားကြောင်း UNIAP တာဝန်ရှိသူတဦးက ပြောကြားသည်ကို ယခုတပတ်ထုတ် ပြည်တွင်း သတင်းဂျာနယ် တစောင်တွင် ဖော်ပြထားသည်။

ပြီးခဲ့သည့် စနေနေ့က လူကုန်ကူးမှု တိုက်ဖျက်ရေး လှုပ်ရှားမှုအဖြစ် MTV EXIT ကမ်ပိန်းအဖွဲ့ကလည်း ရန်ကုန်မြို့ ဆီဒိုးနား ဟိုတယ်တွင် လူကုန်ကူးခံရသူများအကြောင်း မှတ်တမ်းတင် ရိုက်ကူးထားသည့် ဇာတ်ကား ပြသခဲ့ပြီး၊ အဆိုတော် ဖြူဖြူကျော်သိန်းကိုလည်း အဖွဲ့၏ သံအမတ်အဖြစ် ခန့်အပ်ခဲ့သေးသည်။

ဆီဒိုးနားတွင် ပြသခဲ့သော အဆိုပါ မှတ်တမ်းတင် ဇာတ်ကားကို မြဝတီ၊ MRTV-3၊ MRTV-4 စသည့် စစ်အစိုးရ ရုပ်မြင်သံကြား လိုင်းများတွင်ပါ ထုတ်လွှင့်ပြသရန် သဘောတူညီထားကြောင်း သိရသည်။

အမေရိကန် နိုင်ငံခြားရေးဌာန၏ ယခုနှစ်အတွင်း ထုတ်ပြန်ခဲ့သည့် “၂၀၀၉ ခုနှစ် လူကုန်ကူးမှု - မြန်မာနိုင်ငံ'' ဆိုသည့် အစီရင်ခံစာတွင် ဖော်ပြထားသည့် လူကုန်ကူးမှု အဆိုးဝါးဆုံး ဖြစ်ပေါ်နေသည့် နိုင်ငံစာရင်းတွင် မြန်မာနိုင်ငံလည်း ပါဝင်သည်။

စစ်အစိုးရမှာ စီးပွားရေးအရ လိင်ပိုင်းဆိုင်ရာ အမြတ်ထုတ်ရန်နှင့် လုပ်အားပိုင်းဆိုင်ရာ အမြတ်ထုတ်ရန် လူကုန်ကူးခြင်း ကိစ္စများကို ထိရောက်စွာ ကိုင်တွယ်ခြင်း မရှိဘဲ လူကုန်ကူးမှု ပပျောက်ရေးအတွက် လိုအပ်သော အနိမ့်ဆုံး အဆင့် ကြိုးပမ်း ဆောင်ရွက်မှုမျိုးကိုပင် ပြုလုပ်ခဲ့ခြင်း မရှိကြောင်း အစီရင်ခံစာက ဆိုသည်။

၂၀၀၈ ခုနှစ်အတွင်း တရုတ်၊ ထိုင်း၊ မလေးရှား၊ ဂျပန်၊ စင်္ကာပူ၊ ဘင်္ဂလားဒေ့ရ်ှနှင့် ဂျမေကာ စသည့် နိုင်ငံများက မြန်မာ စစ်အစိုးရထံသို့ လူကုန်ကူး ခံရသူပေါင်း ၆၈၆ ဦး ပြန်လည် လွှဲပြောင်းပေးခဲ့ကြောင်း UNIAP ၏ အင်တာနက် စာမျက်နှာတွင် ဖော်ပြထားသည်။

ထိုကဲ့သို့ လူကုန်ကူးခံရသဖြင့် ပြန်ပို့ခံရသူများတွင် ထိုင်းနိုင်ငံမှ ၃၄၄ ဦးဖြင့် အများဆုံးဖြစ်ပြီး၊ တရုတ်နိုင်ငံမှ ၂၈၃ ဦးဖြင့် ဒုတိယ အများဆုံး ဖြစ်သည်။

မြန်မာနိုင်ငံတွင် လူကုန်ကူးမှု လျော့ကျရေး လုပ်ဆောင်မည်ဆိုလျှင် အာဏာပိုင်များအကြား လူကုန်ကူးမှု ဥပဒေများနှင့် ပတ်သက်၍ နားလည်မှု ပိုမိုထားရှိရန်နှင့် လူကုန်ကူးမှုများကို ပူးပေါင်းဖော်ထုတ်ရန် လိုအပ်နေသည်ဟု UNIAP အင်တာနက် စာမျက်နှာတွင် ရေးသားထားသည်။ သို့မှသာ လူကုန်ကူး ခံရသူများအနေဖြင့် အကြောက်တရား ကင်းမဲ့စွာဖြင့် နေအိမ်များသို့ ပြန်နိုင်မည် ဖြစ်ကြောင်း ပြောဆိုထားသေးသည်။

စစ်အစိုးရ ပြည်ထဲရေး ဝန်ကြီးဌာနက ၂၀၀၇ ခုနှစ်မှ ၂၀၁၁ ခုနှစ်အထိ လူကုန်ကူးမှု တိုက်ဖျက်ရေး ၅ နှစ် စီမံကိန်းအဖြစ် ချမှတ် ဆောင်ရွက်လျက်ရှိကြောင်း ၂၀၀၇ ခုနှစ် ဒီဇင်ဘာလ နှောင်းပိုင်းတွင် ထုတ်ပြန် ပြောဆိုခဲ့သည်။

(ရဲရင့်အောင် တည်းဖြတ်သည်။)