အလုပ်သမားလက်မှတ်ရှိသူများသာ ယာယီနိုင်ငံကူးလက်မှတ်လုပ်ခွင့်ရှိ

NEJ / ၂၈ သြဂုတ် ၂၀၀၉

ယာယီနိုင်ငံကူးလက်မှတ်ကိုင်ဆောင်သူများသည် ထိုင်းနိုင်ငံအလုပ်သမားဥပဒေအတိုင်း ခံစားခွင့်ရှိပြီး ထိုင်းနိုင်ငံအတွင်း လွတ်လပ်စွာသွားလာခွင့်ရှိသည်ဟု မြန်မာဘက်က ပြောသည်။

ယာယီနိုင်ငံကူးလက်မှတ်များကို ယခင်လ (၁၅) ရက်မှ စတင်ပြုလုပ်ပေးပြီး အဆိုပါလက်မှတ်ဖြင့် ထိုင်းတနိုင်ငံလုံးတွင် အလုပ်လုပ်ခွင့်နှင့် သွားလာခွင့်ရရှိမည်ဖြစ်ပြီး တရားဝင်ဗီဇာဖြင့် နေထိုင်ခွင့် (၂) နှစ်ရမည်ဟု မြန်မာဘက်မှထုတ်ဝေသည့် လက်ကမ်းစာစောင်တွင် ပါရှိသည်။

မြန်မာရွှေ့ပြောင်းအလုပ်သမားများအတွက် ထိုင်းမှထုတ်ပေးသည့် အလုပ်လုပ်ခွင့် အလုပ်သမားလက်မှတ်သည် ရှေ့နှစ် ဖေဖော်ဝါရီလတွင် သက်တမ်းကုန်ဆုံးပါက ဆက်လက်သက်တမ်းတိုးပေးတော့မည်မဟုတ်ဘဲ အလုပ်ဆက်လုပ်လိုသူများသည် မြန်မာနိုင်ငံတွင် ဗီဇာလက်မှတ်ပြန်ယူရမည်ဖြစ်သည်။

၂၀၁၀ ခုနှစ် ဖေဖော်ဝါရီလ နောက်ပိုင်း တရားမ၀င်နေထိုင်သည့် ရွှေပြောင်းအလုပ်သမားများကို လိုက်လံဖမ်းဆီးပြီး နေရင်းနိုင်ငံများသို့ ပြန်ပို့မည်ဟု ထိုင်းဘက်မှ ကြေညာထားသည်။

မြန်မာဘက်မှထုတ်ပေးနေသည့် ယာယီနိုင်ငံကူးလက်မှတ်လုပ်ခြင်းဖြင့် ထိုင်းနိုင်ငံတွင်းရောက် မြန်မာများအလုပ်သမားများ အတွက် အာမခံချက်ရှိလာမည်ဟု မြန်မာအလုပ်သမားအချို့က ပြောသည်။

ဘန်ကောက်အထည်ချုပ်စက်ရုံတခုမှ နော်အိုင်းရစ်က “ဒီ (၂) သက်တမ်း ဗီဇာရထားတော့ အရင်လို အပြင်ထွက်ရင် အဖမ်းခံရမဲ့ပြဿနာမျိုး မရှိတော့ဘူး။ ထိုင်းတနိုင်ငံလုံးကို သွားခွင့်ရှိတော့ အရင်ကလို မဲဆောက်နဲ့ဘန်ကောက်ကို ဘတ် (၁၅,၀၀၀) ပေးပြီးတော့ မရေရာတဲ့ခရီးမျိုး သွားစရာလည်းမလိုတော့ဘူး ကိုယ့်လက်မှတ်ကိုယ်ကိုင်ပဲ။ အလုပ်ရှင်လည်း ကိုယ့်ကို အကျပ်ကိုင်လို့မရတော့ဘူး” ဟု ပြောသည်။

ယခုကဲ့သို့ အခွင့်အရေးများ ယခင်ကမရရှိဘဲ အလုပ်လုပ်ခွင့်မှတ်ပုံတင်ကို အလုပ်ရှင်က သိမ်းထားသဖြင့် အပြင်ထွက်လျှင် ထိုင်းပုလိပ်အဖမ်းခံရကာ နယ်စပ်ပြန်ပို့ခံရမှုများရှိကြောင်း၊ အခါကြီးရက်ကြီးများတွင် အခက်အခဲမရှိ မြန်မာနိုင်ငံ ပြန်ခွင့်ရှိသောကြောင့် ထိုင်းနိုင်ငံအတွင်းပိုင်းရောက်ရှိနေသူများ လုပ်ထားသင့်သည်ဟု ၎င်းက ပြောသည်။

ဘန်ကောက်တွင် အိမ်ဖော်လုပ်သူတဦးကလည်း “ယာယီနိုင်ငံကူးလက်မှတ်ဆိုပေမယ့် (၂) နှစ်ဗီဇာအတွက်ဘတ် (၂,၀၀၀) ပဲ ဆိုတော့ တန်ပါတယ်။ ကိုယ့်အတွက် ရေရှည်အာမခံချက်ရှိလို့ အခုလိုမြ၀တီမှာ သွားလုပ်တာပါ။ တချို့လုပ်ချင်ပေမယ့် သူတို့အလုပ်ရှင်တွေက လုပ်မပေးတာတွေ များတယ်” ဟု ပြောသည်။

ထိုင်းအလုပ်သမားမှတ်ပုံတင်ရှိသူများသာ ယာယီနိုင်ငံကူးလက်မှတ်ပြုလုပ်နိုင်ပြီး ထိုင်းအလုပ်ရှင်နှင့်အတူ နယ်စပ်မြို့များဖြစ် သည့် မြ၀တီ၊ ကော့သောင်း၊ တာချီလိတ်တို့တွင် မြန်မာမှတ်ပုံတင်ပါ ပြသရမည်ဖြစ်သည်။ အလုပ်သမားလက်မှတ်မရှိသူများ လုပ်ခွင့်မရှိပေ။

ထိုင်းနိုင်ငံရောက် မြန်မာရွှေ့ပြောင်းအလုပ်သမားများအား ထိုင်းအစိုးရက ပြီးခဲ့သည့် ဇူလိုင်မှ ယခုလ (၂၉) ရက်ထိ အလုပ်သမားမှတ်ပုံတင်ရန် အချိန်ကန့်သတ်ပေးခဲ့ပြီး ယင်းကာလအတွင်း မှတ်ပုံတင်မပြုလုပ်သူများသည် တရားမ၀င်အလုပ်သမားများအဖြစ် သတ်မှတ်ခံရမည်ဖြစ်သည်။

လက်မှတ်အတွက် မြန်မာဘက်တွင် ကျပ် (၃,၀၀၀) ပေးရပြီး (၂) နှစ်စာဗီဇာကြေးအတွက် ထိုင်းလ၀ကသို့ ဘတ် (၂,၀၀၀) ပေးသွင်းပြီး ထိုင်းတနိုင်ငံလုံးသို့ လွတ်လပ်စွာသွားလာခွင့်ရှိသည်။

လက်ရှိထိုင်းတွင် မှတ်ပုံတင်ထားသူ မြန်မာအလုပ်သမား (၇) သိန်းခွဲခန့်ရှိပြီး ယာယီနိုင်ငံကူးလက်မှတ် လာရောက်ထုတ်ယူသူ (၁၀၀) ကျော်ခန့်သာရှိသေးသည်ဟု မြန်မာဘက်က ပြောသည်။

ထိုင်းအလုပ်သမားဝန်ကြီးဌာန၏ စာရင်းများအရ ထိုင်းနိုင်ငံတွင် မြန်မာအလုပ်သမား (၁.၅) သန်း ရှိသည်ဟု သိရသည်။

ယာယီမြန်မာနိုင်ငံကူးလက်မှတ် ထုတ်ပေးသည့်ကိစနှင့်ပတ်သက်၍ မြန်မာနိုင်ငံ အလုပ်သမား သွေးစည်းညီညွတ်ရေးအဖွဲ့၏ တာဝန်ခံ ဦးသံဒုတ်ကမူ “ဒီလုပ်ငန်းစဉ်ဟာ အောင်မြင်မယ်လို့ မထင်ဘူး။ အဓိက အကြောင်းအရင်းကတော့ မြန်မာနိုင်ငံဟာ အာဏာရှင်တွေရဲ့ အစီအစဉ်နဲ့ သွားနေရတော့ အလုပ်သမား၊ လူဝင်မှု၊ နိုင်ငံခြားရေး စတဲ့ဝန်ကြီးဌာနတွေဟာ ဘာလုပ်ပိုင်ခွင့်မှ မရှိဘူး။ စစ်အာဏာရှင်တွေရဲ့ ယန္တရားက မှန်ကန်တဲ့တွေးခေါ်မှုမရှိတော့ ပြည်သူတွေက သူတို့ကို မယုံကြည်ဘူး” ဟု ခေတ်ပြိုင်သို့ ပြောသည်။