ရောင်ခြည်ဦးအလုပ်သမားများအဖွဲ့( ဘန်ကောက်)

Sunday, 9 May 2010

မလေးရှိ နိုင်ငံခြားသား အလုပ်သမားများအား သက်တမ်း တိုးပေးတော့မည်မဟုတ်

မလေးရှားနိုင်ငံရှိ လုပ်သက် (၅) နှစ် ပြည့်သွားသော မြန်မာအပါအ၀င် နိုင်ငံခြားသား ရွှေ့ ပြောင်းအလုပ်သမားများအား မလေးရှားအစိုးရက အလုပ်လုပ်ခွင့်သက်တမ်းများ ထပ်တိုးမပေးတော့ဟု သိရသည်။ လူဦးရေ (၂၅) သန်းရှိသော မလေးရှားနိုင်ငံတွင် (၂.၂) သန်းရှိနေသော နိုင်ငံခြားသား ရွှေ့ ပြောင်းအလုပ်သမားများအား (၁.၅) သန်းအထိ လျှော့ချရန် ရည်ရွယ်၍ မလေးရှားအစိုးရက သက်တမ်းတိုးခွင့် ရပ်ဆိုင်းလိုက်ခြင်းဖြစ်သည်။ ယင်းသို့ ပြုလုပ်မည့်အကြောင်းကို ယခုနှစ်ဦးပိုင်းတွင် အလုပ်သမားဝန်ကြီးနှင့် ပြည်ထဲရေးဝန်ကြီးတို့က တရားဝင် ပြောကြားခဲ့သော်လည်း ယခုရက်ပိုင်းမှစ၍ သက်တမ်းတိုးပေးမှုများကို စတင်ရပ်ဆိုင်းလာခြင်းဖြစ်သည်။

မလေးရှားမှ သက်တမ်းတိုးရန် ငြင်းပယ်ခံရသူတဦးက “ကျနော့်နာမည် စောလှမြင့်ပါ၊ ဧရာဝတီတိုင်းက ကရင်လူမျိုးပါ၊ ဒီမှာ စတီးဂဟေဆော်တဲ့ အလုပ်လုပ်ပါတယ်။ လုပ်ငန်းကျွမ်းကျင်လို့ တနေ့ကို (၅၀) ရင်းဂစ်ရပါတယ်။ အိုဗာတိုင်ရှိရင် တနေ့ကို ပျမ်းမျှ (၇၅) ရင်းဂစ်လောက်ရပါတယ်။ သက်ဆိုင်ရာ လ၀ကကို အရင်အပတ်က သူဌေးကသွားတယ်။ လ၀က က သက်တမ်းတိုးလို့မရပါ၊ (၅) နှစ်ပြည့်သွားပြီ၊ ပြန်ပို့ဖို့အတွက် စီစဉ်ပါလို့ ပြောတယ်လို့သိရတယ်။ ကျနော့်သက်တမ်းက (၆) လပိုင်းဆိုရင် ကုန်ပြီ။ သူဌေးကတော့ ပြောပါတယ်၊ နေရဲရင် အလုပ်ဆက်ခန့်မယ်လို့ ပြောတယ်။ ပြန်သွားရင် စုဆောင်းထားတာ မရှိတော့ ပြန်လာဖို့မလွယ်ဘူး။ ရွာမှာလည်း အလုပ်အကိုင်တွေ အဆင်မပြေတော့ မိသားစုကလည်း နေလို့ရသလောက်နေပါလို့ ပြောနေတော့ မပြန်ဘဲ အိုဖို့ဆုံးဖြတ်လိုက်တာပါ။ ကံမကောင်းလို့ ရဲအဖမ်းခံရမှပဲ ပြန်တော့မယ်ဗျာ” ဟုဆိုသည်။
သက်တမ်းဆက်တိုးမပေးတော့သော်လည်း မြန်မာပြည်သားအများစုသည် နေရပ်ရင်းသို့ မပြန်လိုသူများထဲတွင် ထိပ်ဆုံးမှ ရှိနေပြီး ဒုက္ခသည်အဖြစ် ဒုက္ခသည်များဆိုင်ရာမဟာမင်းကြီးရုံး (UNHCR) သို့ လျှောက်ထားမည့်သူ များလာနေသည်ဟု သိရသည်။
မလေးရှားနိုင်သို့ လာရောက် အလုပ်လုပ်ကိုင်သူများသည် (၃) နှစ် စာချုပ်ဖြင့် ပထမဦးစွာ အလုပ်လုပ်ရပြီး အလုပ်ရှင်က နှစ်သက်ပါက ထပ်မံ၍ (၂) နှစ်ဆက်လက် လုပ်ကိုင်ခွင့်ရှိသည်။ ထို့နောက် လုပ်ငန်းရှင်မှ ထပ်မံခန့်ထားလိုပါက လုပ်ငန်းကျွမ်းကျင် လက်မှတ်လျှောက်ရပြီး ရခဲ့လျှင် ထပ်မံ၍ (၅) နှစ် နေခွင့်ရှိပြီး စုစုပေါင်း (၁၀) နှစ် နေထိုင် လုပ်ကိုင်နိုင်ခွင့်ရှိသည်။
ယခုအခါတွင် အိုဗာစတေးဖြင့် နေထိုင်သော အလုပ်သမားများအား မလေးအစိုးရကလည်း နေ့စဉ်ရက်ဆက် ဆိုသလို ဖမ်းဆီးမှုများ ပြုလုပ်လျက်ရှိသည်။
မလေးရှားတွင် လူဝင်မှုကြီးကြပ်ရေး ထိန်းသိန်းရေးစခန်း (၁၃) ခုရှိပြီး တခုလျှင် အနည်းဆုံးလူဦးရေ (၁,၀၀၀) ခန့်ကို ဖမ်းဆီးထိန်းသိမ်းထားကာ ထိုသူများထဲတွင် မြန်မာနိုင်ငံသား (၃,၀၀၀) မှ (၅,၀၀၀) အထိ အထိန်းသိမ်းခံနေရသည်။
မလေးရှားနိုင်ငံအတွင်း အလုပ်သမားအရေး လုပ်ကိုင်ဆောင်ရွက်နေသော Burma Campaign Malaysia မှ ကိုထွန်းထွန်းက “အခုကိစ္စနဲ့ပတ်သက်ပြီး မလေးအစိုးရအနေနဲ့ မှားယွင်းတဲ့ ပေါ်လစီလို့မြင်တယ်။ ဘာကြောင့်လဲဆိုတော့ လက်ရှိလုပ်ငန်း ကျွမ်းကျင်သူတွေကို ပြန်ပို့ပြီး အသစ်တွေကို ခေါ်ယူခွင့်ပေးထားတော့ လုပ်ငန်းရှင်တွေအနေနဲ့နစ်နာတယ်။ တဖက်ကလည်း ပို့ကုန်လုပ်ငန်းတွေကို ထိခိုက်နိုင်တယ်။ ဒါကြောင့် အလုပ်ရှင် အလုပ်သမား နှစ်ဖက်နစ်နာမှုတွေ ဖြစ်စေတယ်။ အကျိုးအမြတ် ရသူတွေကတော့ အလုပ်သမား ခေါ်ယူပေးတဲ့ ပွဲစား (အေးဂျင့်) တွေပဲ ဖြစ်တယ်” ဟု ဆိုသည်။
မလေးရှားနိုင်ငံတွင် မြန်မာရွှေ့ ပြောင်း အလုပ်သမား (၇) သိန်းခန့်ရှိမည်ဟု ခန့်မှန်းထားကြပြီး သံပန်းသံတခါး လုပ်ငန်း၊ အထည်ချုပ်လုပ်ငန်း၊ ဆောက်လုပ်ရေးလုပ်ငန်း၊ ပလတ်စတစ်လုပ်ငန်း၊ အီလက်ထရောနစ် အပိုပစ္စည်း ထုတ်လုပ်ရေးလုပ်ငန်း စသည်တို့တွင် မြန်မာအလုပ်သမားအများစု လုပ်ကိုင်လေ့ရှိကာ ယခင်က တနေ့လျှင် (၁၈.၅) ရင်းဂစ်အနည်းဆုံး ရရှိကြပြီး ယခုနောက်ပိုင်း ဝင်ရောက်လာသူများသည် လ၀က၏ အနိမ့်ဆုံးလစာ သတ်မှတ်ချက်ကြောင့် တနေ့လျှင် (၂၁) ရင်းဂစ် ရရှိကြသည်။

အပြည့်အစုံသို့ >>

လူကုန်ကူးခံရသူများအား ယာယီနေထိုင်ခွင့်နှင့် အလုပ်လုပ်ခွင့်ပြုမည်

မြတ်ခိုင်ဦး/ ၆ မေ ၂ဝ၁ဝ ခေတ်ပြိုင်

ထိုင်းနိုင်ငံတွင် ထိန်းသိမ်းထားသော လူကုန်ကူးခံရသူများအား ယာယီနေထိုင်ခွင့်ပေးပြီး အလုပ်လုပ်ကိုင်ခွင့်ပြုရန် ထိုင်းအစိုးရက မေ (၄) ရက်တွင် ညွှန်ကြားချက် ထုတ်ပြန်လိုက်သည်။
အဆိုပါညွှန်ကြားချက်ကို မေ (၄) ရက်တွင်ပြုလုပ်သည့် ထိုင်းအစိုးရ၀န်ကြီးများအစည်းအဝေးတွင် အတည်ပြုကာ ထိုင်းပြည်ထဲရေးဝန်ကြီးဌာနမှ တာဝန်ယူဆောင်ရွက်သွားရန် သဘောတူခဲ့ခြင်းဖြစ်သည်။

ယာယီထိန်းသိမ်းရေးစခန်းများတွင် ထိန်းသိမ်းထားသည့် လူကုန်ကူးခံရသူများအား အမှုရင်ဆိုင်နေရစဉ်အတွင်း အမှုအတွက် အကျိုးရှိစေရန်၊ ဆေးဝါးကုသခွင့်ရရှိနိုင်စေရန်၊ ပြန်လည်ထူထောင်ရေး လုပ်ဆောင်နိုင်စေရန်နှင့် မိမိတို့အခွင့်အရေးများ တောင်းဆိုနိုင်စေရန် ရည်ရွယ်၍ အထူးသတ်မှတ်ချက်အနေဖြင့် ထိုင်းနိုင်ငံတွင် ယာယီနေထိုင်ခွင့်နှင့် အလုပ်လုပ်ခွင့် အခွင့်အရေးပေးအပ်ရန် ထိုင်းအစိုးရက ဆုံးဖြတ်ခဲ့ခြင်းဖြစ်သည်။
အဆိုပါလူကုန်ကူးခံရသူများအား ထိုင်းနိုင်ငံအတွင်း ယာယီနေထိုင်ခွင့်ပြုခြင်းနှင့် ဥပဒေနှင့်အညီ အလုပ်လုပ်ကိုင်ခွင့်ပြုရန် ပြည်ထဲရေးဝန်ကြီးဌာန၊ လူမှုဖွံ့ဖြိုးတိုးတက်ရေးဌာနနှင့် လုံခြုံရေးဌာန၊ အလုပ်သမားဝန်ကြီးဌာနတို့ ပူးပေါင်း၍ စည်းမျဉ်းစည်းကမ်း၊ လုပ်ထုံးလုပ်နည်းများကို ရေးဆွဲအတည်ပြုရန်အတွက်လည်း အခွင့်အာဏာ အပ်နှင်းကြောင်း ထိုင်းအစိုးရအဖွဲ့က သတင်းထုတ်ပြန်ထားသည်။
အဆိုပါသတင်းနှင့်ပတ်သက်၍ ပြည်ထောင်စုမြန်မာနိုင်ငံ အမျိုးသားညွန့်ပေါင်းအစိုးရ ဒုက္ခသည်နှင့် ရွှေ့ပြောင်းအလုပ်သမား ရေးရာ ဌာနတာဝန်ခံ ဦးသက်ခိုင်က “အခုလို ခွင့်ပြုတယ်ဆိုတာ အလွန်ကို ၀မ်းသာစရာပါ။ မဟုတ်ရင် သူတို့ဟာ အချိန်အတော်ကြာ စခန်းထဲမှာ အမှုပြီးတဲ့အထိ အဓိပ္ပာယ်မဲ့နေထိုင်ရမှာဖြစ်ပါတယ်။ ဒီအမှု မဖြစ်ခင်ကတည်းကိုက လူကုန်ကူးမှုသားကောင်အဖြစ် ခံခဲ့ရတဲ့ သူတို့ရဲ့ ခါးသည်းတဲ့ အတွေ့အကြုံတွေအတွက် ဒါဟာ ဆေးကောင်းတလက် ဖြစ်နိုင်ပါတယ်။ လိုအပ်တဲ့ အသေးစိတ် ဥပဒေ၊ စည်းမျဉ်းစည်းကမ်းတွေကိုတော့ ကျနော်တို့ စောင့်ရဦးမှာပေါ့ဗျာ” ဟု ဆိုသည်။
အိမ်နီးချင်းနိုင်ငံများဖြစ်သော မြန်မာ၊ လာအို၊ ကမ္ဘောဒီးယား နိုင်ငံသားတို့သည် လူမှောင်ခိုဂိုဏ်းများ၊ မာဖီးယားဆန်သော လူမိုက်အုပ်စုများနှင့် အချို့သော ဒေသဆိုင်ရာ အာဏာပိုင်များကြောင့် နေ့စဉ်နှင့်အမျှ ထိုင်းနိုင်ငံအတွင်းသို့ လူကုန်ကူးခံကြရပြီး အချို့ဖြစ်စဉ်များတွင် လူကုန်ကူးခံရသူများသည် သတ်ဖြတ်ညှဉ်းဆဲခံကြရသည်။
၂၀၀၈ ခုနှစ် ဧပြီလအတွင်း လူမှောင်ခိုကူးဂိုဏ်းများ၏ သယ်ဆောင်လာမှုကြောင့် မြန်မာအလုပ်သမား (၅၄) ဦးသည် အလုံပိတ် ငါးသယ်သည့် အအေးခန်းကားအတွင်း အောက်စီဂျင် မလုံလောက်မှုကြောင့် သေဆုံးခဲ့ရပြီး ယခုနှစ်ဦးပိုင်း ဇန်န၀ါရီလ အတွင်းကလည်း မြန်မာအလုပ်သမား (၉) ဦးသည် တောင်းဆိုသော ငွေကြေးမပေးနိုင်သောကြောင့် မဲဆောက်မြို့တောင်ဘက် ဖုတ်ဖရာဒေသရှိ တောနက်တနေရာတွင် ဒေသဆိုင်ရာ အာဏာပိုင်ရဲအရာရှိ၏ သတ်ဖြတ်ခြင်းခံခဲ့ကြရသည်။

အပြည့်အစုံသို့ >>

Saturday, 8 May 2010

ထိုင်းနိုင်ငံသို့ တရားမ၀င် ၀င်ရောက်သော မြန်မာ (၁၀၃) ဦး ဖမ်းမိ

မြတ်ခိုင်ဦး/ ၅ မေ ၂ဝ၁ဝ ခေတ်ပြိုင်

ရွှေ့ပြောင်းအလုပ်သမားများအား ထိုင်းနိုင်ငံတွင်း အလုပ်လုပ်ကိုင်ခွင့်လက်မှတ်အသစ် ထုတ်ပေးတော့မည်မဟုတ်ဟု ထိုင်းအစိုးရဘက်မှ ပြောဆိုနေသော်လည်း ထိုင်းနိုင်ငံအတွင်းသို့ မြန်မာနိုင်ငံသားများ တရားမ၀င် ဝင်ရောက်နေဆဲဖြစ်ပြီး ယခုလ (၃) ရက်တွင် မြန်မာပြည်သား (၁၀၃) ဦးအား ထိုင်းဒေသဆိုင်ရာ စစ်တပ်နှင့်နယ်ခြားစောင့်တပ်တို့က ဖမ်းဆီးရမိသည်။

မေ (၃) ရက် ညနေ (၄) နာရီနှင့် (၇) နာရီအချိန်တွင် ဘုရားသုံးဆူနယ်စပ်မှ ထိုင်းနိုင်ငံအတွင်းသို့ တရားမ၀င် ဝင်ရောက်လာသော မြန်မာပြည်သား (၁၀၃) ဦးအား ကန်ချနဘူရီခရိုင်၊ စံခရဘူရီမြို့နယ်အတွင်းရှိ ဘူရားသုံးဆူလမ်းခွဲအနီး ထိုင်းကရင်လူမျိုးများနေထိုင်ရာ စနီဖောင်းကျေးရွာအ၀င်တွင် ထိုင်းအာဏာပိုင်များက ဖမ်းဆီးရမိခြင်းဖြစ်သည်။ အဖမ်းခံရသူများသည် အသက် (၁၅) နှစ်မှ (၄၅) နှစ်အရွယ် အလုပ်လုပ်ကိုင်နိုင်သော အရွယ်များဖြစ်ကြသည်။
“လူအုပ်တွေ့တယ်ဆိုတဲ့ သတင်းရလို့ အာဏာပိုင်တွေက သွားရောက်ဖမ်းဆီးတာမှာ မေလ (၃) ရက် ညနေ (၄) နာရီမှာ ကျား (၉) ယောက် မ (၁၄) ယောက်၊ ပေါင်း (၂၃) ယောက်နဲ့ ညနေ (၇) နာရီမှာ ကျား (၃၁) မ (၄၉) ယောက်၊ ပေါင်း (၈၀) အားလုံးစုစုပေါင်း (၁၀၃) ယောက်ကို ဖမ်းမိတယ်” ဟု ထိုင်းအာဏာပိုင်သတင်းရပ်ကွက်နှင့် နီးစပ်သူတဦးက အတည်ပြု ပြောကြားသည်။
ယင်းသို့ဖမ်းမိရာတွင် ထိုသူများကို ခေါ်ဆောင်လာသော ပွဲစားကို မသိရဘဲ အဆိုပါပွဲစားသည် လူအုပ်အတွင်း ရောနှောသွားဖွယ် ရှိသည်ဟု ၎င်းက ပြောသည်။
ထိုင်းနိုင်ငံအတွင်း ပွဲစားနှင့်ဝင်ရောက်လာသူတို့သည် အဖမ်းခံရပါက (၃) ကြိမ်တိုင်တိုင် ပြန်လည်ပို့ဆောင်ပေးမည်ဟု အာမခံချက်ရှိသဖြင့် ပွဲစားအား ငွေထပ်မံပေးရခြင်း မရှိပေ။
အဖမ်းခံရသူများသည် မော်လမြိုင်၊ မုဒုံ၊ သံဖြူဇရပ်၊ ကျိုက်မရော မြို့နယ်တို့မှ ထိုင်းနိုင်ငံအတွင်းသို့ အလုပ်လုပ်ကိုင်ရန် လာရောက်ကြခြင်းဖြစ်ပြီး ထိုသို့လာရောက်ရန်အတွက် တဦးလျှင် မြန်မာငွေ ကျပ် (၅) သိန်းစီ ပွဲစားအား ပေးအပ်ခဲ့ရကြောင်း၊ ၎င်းတို့အား လာရောက်ခေါ်ဆောင်မည့် ကားအလာကို စောင့်ဆိုင်းနေစဉ် ဖမ်းဆီးခံရခြင်းဖြစ်ကြောင်း၊ ယမန်နေ့ နံနက်တွင် အဖမ်းခံရသူများအား ဘုရားသုံးဆူနယ်စပ်သို့ ပြန်လည်လွှတ်ပေးလိုက်ကြောင်း အဆိုပါ ထိုင်းအာဏာပိုင်နှင့် နီးစပ်သူက ပြောသည်။
မြန်မာနိုင်ငံအတွင်း စားဝတ်နေရေး ကျပ်တည်းကာ အလုပ်အကိုင်ရှားပါးမှုတို့ကြောင့် အရွယ်ကောင်းပြီး အလုပ်လုပ်ကိုင်နိုင်သော မြန်မာပြည်သားများသည် ထိုင်း၊ မလေးရှား စသောနိုင်ငံများသို့ အလုပ်လုပ်ကိုင်ရန် နည်းလမ်းပေါင်းစုံဖြင့် နယ်စပ်ဒေသအသီးသီးမှ ၀င်ရောက်လျက်ရှိသည်။
ထိုင်းနိုင်ငံတွင် မှတ်ပုံတင်ထားသော မြန်မာရွှေ့ ပြောင်း အလုပ်သမား (၁,၀၇၉,၉၉၁) ဦးရှိပြီး၊ တရားဝင်နှင့် တရားမ၀င် စုစုပေါင်း (၂) သန်းခန့်ရှိမည်ဟု အလုပ်သမားအရေး ဆောင်ရွက်နေသော အဖွဲ့အစည်းများက ခန့်မှန်းသည်။
ထိုင်းအစိုးရအနေဖြင့် ထပ်မံ၍ အလုပ်လုပ်ကိုင်ခွင့် လက်မှတ်အသစ် ထုတ်ပေးတော့မည့် အစီအစဉ်မရှိကြောင်း ဧပြီလအတွင်းက အလုပ်အကိုင် ခန့်ထားရေးဌာန ညွှန်ကြားရေးမှူးက အခိုင်အမာ ပြောဆိုခဲ့ပြီးဖြစ်သည်။
သို့သော် ထိုင်းနိုင်ငံတွင်းသို့ တရားမ၀င် ၀င်ရောက်မှုများ ရှိနေဆဲဖြစ်ပြီး ပြီးခဲ့သည့်လများအတွင်း ထိုင်း-မြန်မာနယ်စပ် တောင်ဘက်စွန်း ကော့သောင်း၊ ရနောင်းဒေသဘက်တွင် တရားမ၀င် ၀င်ရောက်လာသည့် မြန်မာနိုင်ငံသားများအား ဖမ်းဆီးပြန်လည်ပို့ဆောင်မှုများ ရှိခဲ့သည်။

အပြည့်အစုံသို့ >>

ILO အဓမ္မလုပ်အားပေး ပညာပေးစာစောင် ဖြန့်ချီမည်

ခိုင်စု | အင်္ဂါနေ့၊ မေလ ၀၄ ရက် ၂၀၁၀ ခုနှစ် ၁၉ နာရီ ၁၅ မိနစ်

နယူးဒေလီ (မဇ္ဈိမ)။ ။ ရန်ကုန်ရှိ ကမ္ဘာ့အလုပ်သမားအဖွဲ့ချုပ် ILO နှင့် စစ်အစိုးရ အလုပ်သမား ဝန်ကြီးဌာနတို့ ပူးပေါင်း၍ အဓမ္မလုပ်အားပေးဆိုင်ရာ ပညာပေး လက်ကမ်းစာစောင်များအား ပထမဆုံးအကြိမ်အဖြစ် ယခုလကုန်တွင် နိုင်ငံတဝှန်း ဖြန့်ဝေမည်ဟု သိရသည်။ ပြီးခဲ့သည့်လ ၃ဝ ရက်နေ့တွင် နေပြည်တော်၌ ILO ဆက်သွယ်ညှိနှိုင်းရေးအရာရှိ မစ္စတာ စတိမာရှယ် ဦးဆောင်သော အဇွဲ့နှင့် အလုပ်သမားဝန်ကြီးဌာနမှ ဒုဝန်ကြီး ဗိုလ်မှူးချုပ် တင်ထွန်းအောင်တို့ အစည်းအဝေးက အဆိုပါ လက်ကမ်းစာစောင်များ ပူးတွဲဖြန့်ဝေရန် သဘောတူညီခဲ့ခြင်း ဖြစ်သည်။
“စာသားတွေ အားလုံးက အတည်ပြုချက်ရပါပြီ။ ရှေ့အပတ်မှာ ဒီဇိုင်းတွေ ချရိုက်လို့ပြီးရင် ဖြန့်နိုင်ပါပြီ” ဟု ILO နှင့် နီးစပ်သူ တဦးက မဇ္ဈိမကို ပြောသည်။

“လက်ကမ်းစာစောင်မှာ အဓမ္မလုပ်အားပေး ခိုင်းစေမှုဆိုတာ ဘာလဲ၊ အဓမ္မလုပ်အားပေး ခိုင်းစေမှု မဟုတ်တာက ဘာလဲ၊ အဓမ္မလုပ်အားပေး အခိုင်းခံရရင် တိုင်လို့ရတဲ့အကြောင်း၊ ဘယ်လိုနေရာတွေမှာ တိုင်တန်းနိုင်လဲ၊ တိုင်ရင် လုံခြုံမှု ရှိမရှိ ဆိုတာတွေ ရှင်းပြထားပါတယ်” ဟု သူက ဆက်ပြောသည်။

၆ မျက်နှာပါရှိမည့် စာစောင်၏ ရှေ့ဆုံးမျက်နှာစာ၏ ဘယ်ဘက်ထိပ်တွင် အလုပ်သမားဝန်ကြီးဌာန တံဆိပ်နှင့် ညာဘက်ထိပ်တွင် ILO တံဆိပ် ပါရှိမည်ဖြစ်ကာ အင်္ဂလိပ်-မြန်မာ နှစ်ဘာသာဖြင့် ပုံနှိပ်သွားမည်။

အဓမ္မလုပ်အားပေး ခိုင်းစေမှုအကြောင်းကို မြို့ပြသာမက ကျေးလက်များအထိပါ ကျယ်ပြန့်စွာ ရောက်ရှိရန် NGO အဖွဲ့များ၊ အစိုးရရုံးဌာနများမှတဆင့် ဖြန့်ဝေသွားမည်။ စာစောင်ကုန်ကျစရိတ်ကိုမူ ILO ကပင် ကျခံသွားမည်။

အဓမ္မလုပ်အားပေး ခိုင်းစေမှုဆိုင်ရာ ပညာပေးစာစောင် ဖြန့်ဝေမည့်ကိစ္စကို ပြည်ပအခြေစိုက် အလုပ်သမား သမဂ္ဂများအဖွဲ့ချုပ် FTUB က ကြိုဆိုသော်လည်း မလုံလောက်ဟု ပြောသည်။

''အစိုးရက အဓမ္မလုပ်အားပေးခိုင်းစေမှုနဲ့ပတ်သက်ပြီး လိုက်လျောလာတာဟာ ဆင့်ပါးစပ် နှမ်းပက်သလောက်ပဲ ရှိတယ်။ ဘာလို့ လုပ်တာလဲဆိုတော့ လာမယ့် ဇူလိုင်လ ILO ရဲ့ ညီလာခံမှာ သူတို့ လုပ်အားပေးခိုင်းစေမှုနဲ့ ပတ်သက်လို့ အကြီးအကျယ် ရင်ဆိုင်ဖြေရှင်းရမှာ။ အဲဒါကြောင့် လိုက်လျောမှုတွေရှိတဲ့အကြောင်း နိုင်ငံတကာကို မျက်လှည့်ပြချင်တဲ့ သဘောပေါ့ဗျာ'' ဟု FTUB တွဲဖက်အထွေထွေအတွင်းရေးမှူး ဒေါက်တာဇော်ဝင်းအောင်က ပြောသည်။

သူက ဆက်ပြီး ''လက်ကမ်းစာစောင် ရိုက်ဝေရုံနဲ့ မလုံလောက်ပါဘူး။ သတင်းစာ၊ ရေဒီယို၊ TV တွေကနေ ကြေညာရမှာပါ။ ဘယ်လောက်ကျယ်ကျယ်ပြန့်ပြန့် ဖြစ်လာမလဲဆိုတာ မေးခွန်းတခုပါ။ … အပေါ်ယံပဲ ရှပ်လုပ်တယ်ဆိုရင်တော့ သိပ်အကျိုးရှိမယ်လို့ မမြင်ပါဘူး။ လုပ်အားပေးခိုင်းစေမှုတွေကို ထိထိရောက်ရောက် ကိုင်တွယ်နိုင်အောင် ဥပဒေတွေ ပြဋ္ဌာန်းဖို့ လိုအပ်ပါတယ်။ ဥပဒေအတိုင်း တိတိကျကျ လိုက်နာဖို့လည်း လိုပါတယ်။ အဓမ္မခိုင်းစေမှု ကျူးလွန်တဲ့ သူတွေကိုလည်း ဥပဒေနဲ့ အရေးယူအပြစ်ပေးဖို့ လိုအပ်ပါတယ်။ ခိုင်းစေခံရတယ်လို့ တိုင်ရင် တိုင်တဲ့လူကို ဖမ်းနေတာ ဥပဒေက ပြောင်းပြန် ဖြစ်နေပါတယ်'' ဟု ပြောသည်။

ဧပြီလ ၃ဝ ရက်နေ့ နေပြည်တော် အစည်းအဝေး၌ အလုပ်သမားဝန်ကြီးဌာနနှင့် ILO ပူးပေါင်း၍ အဓမ္မလုပ်အားပေးမှု အသိပညာပေး ဟာပြောပွဲတရပ်အား အဓမ္မလုပ်အားပေး ခိုင်းစေမှုနှင့်ပတ်သက်၍ တိုင်တန်းမှု အများဆုံးဖြစ်သည့် ပဲခူးမြို့၌ ယခုလထဲတွင် ပြုလုပ်ရန် သဘောတူခဲ့သေးသည်။

မြစ်ကြီးနား ၊ ဘားအံ ၊ လားရှိုး ၊ စစ်တွေ ၊ မုံရွာ နှင့် မကွေးမြို့ များတွင် ဟောပြောပွဲများ ပြုလုပ်ပြီး ဒေသဆိုင်ရာ အာဏာပိုင်များကို ပညာပေးခြင်း ဖြစ်သည်။

အပြည့်အစုံသို့ >>

လူကုန်ကူးသူများ နာဂစ်ဒေသကို ပစ်မှတ်ထား

ဧရာဝတီ Monday, May 03, 2010

နာဂစ် မုန်တိုင်းဒဏ် ခံခဲ့ရသည့် ဧရာဝတီ မြစ်ဝကျွန်းပေါ် ဒေသသည် လူကုန်ကူးသူများ သားကောင် ရှာဖွေသည့် အဓိက ပစ်မှတ် ဖြစ်လာကြောင်း အကူအညီ ပေးရေး အဖွဲ့များထံမှ သိရသည်။
မုန်တိုင်း အလွန် ၂ နှစ်တာ ကာလ အတွင်း အကူအညီ လုံလောက်စွာ မရရှိသဖြင့် ထိုဒေသမှ မိသားစု ထောင်ပေါင်း များစွာ အလုပ် လက်မဲ့ ဖြစ်ပြီး စားဝတ် နေရေး ခက်ခဲနေ ခြင်းသည် လူကုန်ကူးသူများ အတွက် အခွင့်အရေး ဖြစ်နေသည်ဟု NGO များက ပြောသည်။ “ဒေသခံတွေ ကိုယ်တိုင်က စားဝတ် နေရေး ကျပ်တည်းတော့ နေရာသစ် တွေဆီ ပြောင်းရွှေ့ ချင်ကြတယ်” ဟု ရန်ကုန် အခြေစိုက် ကရင် အမျိုးသမီး ဖွံ့ဖြိုး တိုးတက်ရေး အဖွဲ့ (Karen Women Action Group) မှ လုပ်အားပေး ၀န်ထမ်း တဦးက ဆိုသည်။

မိသားစုဝင်များ၊ စီးပွားဥစ္စာများ ဆုံးရှုံးသွားခြင်း အပါအ၀င် အခြေအနေ ဆိုးများကြောင့် ထိုဒေသမှ အမျိုးသမီး အများအပြားသည် မြန်မာနိုင်ငံ မြို့ပြဒေသများနှင့် အိမ်နီးချင်းနိုင်ငံများသို့ ပုံစံ အမျိုးမျိုးဖြင့် လူကုန်ကူးခံနေရကြောင်း ဆွစ်ဇာလန်နိုင်ငံ အကူအညီပေးရေး အဖွဲ့တဖွဲ့ထံမှ သိရသည်။ ထိုအမျိုးသမီးများထဲတွင် ဆယ်ကျော်သက်များလည်း ပါဝင်သည်ဟု ဆိုသည်။

“ရန်ကုန်၊ မန္တလေးနဲ့ မြို့ကြီးတွေမှာ ရှိတဲ့ အနှိပ်ခန်း၊ ကာရာအိုကေ အပါအ၀င် လိင်ဖျော်ဖြေရေး လုပ်ငန်းတွေနဲ့ ဆက်နွယ်တဲ့ အလုပ်တွေကို စိတ်မပါဘဲ အတင်းအကျပ် ရောင်းစားခံရပြီး ရောက်သွားတဲ့ မိန်းကလေးတွေလည်း အများကြီး ရှိတယ်” ဟု ရန်ကုန်ရှိ AFXB အဖွဲ့မှ လူကုန် ကူးမှု တိုက်ဖျက်ရေး သင်တန်းနည်းပြ တဦးက ဆိုသည်။

တချို့က မြို့ကြီးများတွင် လစာနည်း အိမ်ဖော်အလုပ်သမားများအဖြစ် လုပ်ကိုင်နေကြသည်ဟု ဆိုသည်။

အမျိုးသမီးတချို့သည် အိမ်နီးချင်း နိုင်ငံများသို့ ရောက်ရှိသွားပြီး ပြည့်တန်ဆာလုပ်ငန်းများတွင် ရောင်းချခံရသည်။ တချို့က တရုတ်နိုင်ငံတွင် ဇနီးမယားအဖြစ် ရောင်းစားခံနေရသည်။

“သူတို့ရဲ့ မိဘဆွေမျိုးတွေကလည်း ပညာမတတ်တော့ ဘယ်သူက ဘယ်လို လာခေါ် သွားတယ် ဆိုတာလည်း မပြောနိုင်ကြဘူး။သတင်း အစအန တခုတောင် ရဖို့ တော်တော် ခက်ခဲတဲ့ အခြေအနေကို ဖြစ်နေတာ” ဟု ပြည်တွင်း NGO တခုမှ လူငယ် ၀န်ထမ်း တဦးက ပြောကြားသည်။

လူကုန်ကူးသူများက ဘ၀ ရပ်တည်ရေး အတွက် ပုံမှန်ဝင်ငွေ ရရှိနိုင်သော အလုပ်အကိုင် ဖန်တီးပေးမည်ဟု လိမ်လည်လှည့်ဖြား တတ်ကြကြောင်း သိရသည်။

“ဆင်းရဲလွန်းလို့ ထွက်ပေါက် ရှာချင်ကြတဲ့ မိန်းကလေးတွေကို ရန်ကုန်မှာ အလုပ်ရမယ်။ တလကို ပိုပိုလျှံလျှံ သုံးနိုင်တဲ့ အပြင် မိဘဆွေမျိုးတွေကို ထောက်ပံ့နိုင်တဲ့လစာငွေကြေးရ မယ် ဆိုပြီး လိမ်ခေါ်သွားတာတွေကများတယ်” ဟု NGO တခုမှ လူကုန်ကူး တိုက်ဖျက်ရေး သင်တန်းနည်းပြ တဦးက ပြောသည်။

မုန်တိုင်းသင့်ဒေသမှ ကလေးငယ် အများ အပြားလည်း လူကုန်ကူးခံနေရသည်။ ၎င်းတို့အနက် အများစုမှာ မြို့ပြဒေသကြီးများတွင် လုပ်ခ လစာ အနည်းငယ်ဖြင့် ပင်ပန်းစွာ ရုန်းကန်နေရကြောင်း သိရသည်။

“ဆိုင်တွေ၊ ဈေးတွေနဲ့ စက်ရုံ၊ အလုပ်ရုံတွေကို တော်တော်များ ရောက်လာကြတာတွေ့ရတယ်။ ကလေးတွေကို မေးကြည့်လိုက်ရင် မြစ်ဝကျွန်းပေါ်က ကလေးတွေ ဖြစ်နေတာ များတယ်။ ဒီကလေးတွေက လုပ်ခ လစာစာနည်းနည်းနဲ့ လူမဆန်အောင် အလုပ်လုပ်တွေ လုပ်နေရတယ်” ဟု သတင်းထောက်တဦးက ပြောသည်။

၂၀၀၉ ခုနှစ်အတွင်း ဖော်ထုတ်နိုင်ခဲ့သော လူကုန်ကူးမှု ၃၀၂ မှု ရှိကြောင်း၊ ထိုအထဲတွင် ၂၀ ရာခိုင်နှုန်းမှာ ကလေးများ လူကုန်ကူးခံရမှုဖြစ်ကြောင်း နိုင်ငံဖြတ်ကျော်မှုခင်းဌာန၏ ဒုတိယရဲမှူးကြီး ရာလျန်မုန်းက ပြောသည်ဟု ရန်ကုန်အခြေစိုက် မော်ဒန်သတင်းဂျာနယ်တွင် ဖော်ပြထားသည်။

အစိုးရ၏ လူကုန်ကူးမှု တိုက်ဖျက်ရေးမှာ အားနည်းလွန်းသည်ဟု NGO အသိုင်းအ၀ိုင်းက ဆိုသည်။

“အရေးယူမှု အပိုင်းရော၊ ပညာပေးမှုအပိုင်းမှာပါ အများကြီး လုပ်ရဦးမှာ။ ပြီးတော့ ရဲတွေ ကိုယ်တိုင်လည်း လူကုန်ကူးမှုတွေမှာ ပါဝင်တာတွေ ရှိတယ်။ ဝေးလံ ခေါင်သီတဲ့ နယ်မြို့တွေမှာ ဖြစ်တဲ့ လူကုန်ကူးမှုတွေမှာ ဒေသခံ အာဏာပိုင်တွေ ပါဝင် ပတ်သက်မှုတွေ ရှိတယ်” ဟု NGO ကြီးတခုမှ တာဝန်ရှိသူ တဦးက ပြောသည်။

မြန်မာနိုင်ငံ ရဲတပ်ဖွဲ့သည် လူကုန်ကူးမှု တိုက်ဖျက်ရေးထက် အတိုက်အခံ နိုင်ငံရေးသမားများနှင့် လူထု ဆန္ဒပြမှုများကို နှိမ်နင်းရေး လုပ်ငန်းများကိုသာ အာရုံစိုက် လုပ်ဆောင်လျက်ရှိသည်ဟု ရန်ကုန်မြို့ခံတချို့က သုံးသပ်နေကြသည်။

မြန်မာနိုင်ငံတွင် လူကုန်ကူးမှု တိုက်ဖျက်ရေး ဌာနခွဲ ၂၂ ခု ရှိပြီး နိုင်ငံတ၀န်း ၁၉ နေရာတွင် လူကုန်ကူးမှု နှိမ်နင်းရေး အဖွဲ့များ ထားရှိသည်ဟု အစိုးရက ပြောသည်။

သို့သော်လည်း ပြည်ထဲရေးဝန်ကြီးဌာနမှ အရာရှိတဦးကမူ ထိုဌာနတွင် ရဲတပ်ဖွဲ့ဝင် အရေအတွက် အလွန် နည်းပါးသည်ဟု ဆိုသည်။

“လူကုန်ကူးမှု နှိမ်နင်းရေးအဖွဲ့ ဆိုတာကလည်း ကြီးကြီး မားမား မဟုတ်ဘူး။ တဖွဲ့မှာ ရဲ ၂ ယောက်လောက်နဲ့ ဖွဲ့ထားတာပါ” ဟု ထိုအရာရှိက ရှင်းပြသည်။

လူကုန်ကူးမှု ကျူးလွန်လျှင် အနည်းဆုံး ထောင်ဒဏ် ၃ နှစ်၊ အများဆုံးတသက်တကျွန်း နှင့် သေဒဏ်အထိ ချမှတ်နိုင်ကြောင်း အစိုးရက ဥပဒေ ထုတ်ပြန်ထားသည်။

အပြည့်အစုံသို့ >>

မြန်မာရွှေ့ ပြောင်း အလုပ်သမား (၈) သိန်းကျော် နိုင်ငံသားစိစစ်ရေးလျှောက်လွှာ တင်သွင်းပြီး

မြတ်ခိုင်ဦး/ ၃ မေ ၂ဝ၁ဝ ခေတ်ပြိုင်

နိုင်ငံသားစိစစ်မှုပြုရေးလျှောက်လွှာ တင်သွင်းပြီးသော မြန်မာအလုပ်သမား အရေအတွက်မှာ ဧပြီ (၂၇) ရက်နေ့အထိ (၈၂၂,၀၉၃) ဦး ရှိပြီး ယာယီနိုင်ငံကူးလက်မှတ် ကိုင်ဆောင်ခွင့် ရရှိထားသူ အရေအတွက်မှာ (၇၁,၃၉၀) ဦး ရှိပြီဖြစ်ကြောင်း ရွှေ့ပြောင်းနေထိုင်သူများဆိုင်ရာ နိုင်ငံတကာအဖွဲ့ (IOM) က ထုတ်ပြန်ပြောဆိုသည်။

ဧပြီ (၃၀) ရက်တွင် ထုတ်ပြန်သည့် အဆိုပါထုတ်ပြန်ချက်တွင် အချက် (၈) ချက်ပါရှိပြီး အဓိကအချက်မှာ အလုပ်သမားတဦးလျှင် ဧဂျင့်များက ဘတ်ငွေ (၅,၀၀၀) ထက်ပို ကောက်ခံခွင့်မပြုကြောင်း၊ အကယ်၍ ပိုမိုကောက်ခံပါက မြန်မာအစိုးရထံသို့ အသိပေးအကြောင်းကြားပြီး ခွင့်ပြုချက်ကို ရုပ်သိမ်းမည်ဖြစ်ကြောင်း ပါရှိသည်။
အဆိုပါ ထုတ်ပြန်ချက်ကို နိုင်ငံသားစိစစ်ရေးပြုမှု လုပ်ငန်းစဉ် လုပ်ကိုင်ဆောင်ရွက်ခွင့်ရသည့် ဧဂျင့် (၁၂) ဖွဲ့အား ထိုင်းအစိုးရက ပြီးခဲ့သည့် ဖေဖော်ဝါရီလအတွင်း ခေါ်ယူတွေ့ဆုံခဲ့ပြီးသည့်နောက် ထုတ်ပြန်ခဲ့ခြင်းဖြစ်သည်။
ထိုင်းအလုပ်အကိုင်ခန့်ထားရေးဌာန ညွန်ကြားရေးမှူးက နိုင်ငံသားစိစစ်မှုလျှောက်လွှာ တင်သွင်းရမည့် နောက်ဆုံးရက်ဖြစ်သော မတ်လ (၂) ရက်နေ့၌ နိုင်ငံတော်ရဲချုပ်သို့ လက်မှတ်မဲ့နှင့် သက်တမ်း မဆက်ထားသော အလုပ်သမားများအား ဖမ်းဆီးခွင့်စာကို ပေးအပ်ထားပြီးဖြစ်ကြောင်း၊ သို့ရာတွင် အလုပ်သမားများမှ ငွေသွင်းပြေစာနှင့် သက်တမ်းဆက်ခွင့် လျှောက်လွှာ တင်သွင်းထားသော မိတ္တူကို ပြနိုင်ပါက အဖမ်းအဆီးမှ ကင်းလွတ်မည်ဖြစ်ကြောင်းလည်း အဆိုပါ ထုတ်ပြန်ချက်တွင် ပါရှိသည်။
ထို့အပြင် ယခုဖြစ်ပွားနေသော အင်္ကျီအနီဝတ်များ၏ ဆန္ဒပြပွဲများတွင် ရွှေ့ပြောင်း အလုပ်သမားများအနေဖြင့် ရည်ရွယ်ချက်မဲ့ ပါဝင်လာမှုကို ကာကွယ်သောအားဖြင့် နယ်စပ်သို့ ယာယီနိုင်ငံကူးလက်မှတ် သွားရောက်ထုတ်ယူရန်အတွက် ခွင့်ပြုမိန့်ကို တတ်နိုင်သမျှ ဆိုင်းငံ့ထားရန် ညွှန်ကြားထားကြောင်းလည်း ထည့်သွင်းဖော်ပြထားသည်။
နိုင်ငံသားစိစစ်ရေးပြုရန် လျှောက်လွှာတင်သွင်းခြင်း မရှိသော အလုပ်သမားများအရေးနှင့်ပတ်သက်၍ အလုပ်အကိုင် ခန့်ထားရေးဌာနမှ စစ်တမ်းတင်သွင်းချက်ကိုမူတည်၍ လိုအပ်လျှင် အချိန်ပိုမိုတိုးချဲ့ပေးသွားရန် စဉ်းစားမည်ဟု ဖော်ပြပါရှိသော်လည်း ထိုင်းအလုပ်အကိုင်ခန့်ထားရေးဌာန ဒါရိုက်တာကမူ အလုပ်လုပ်ကိုင်ခွင့် မှတ်ပုံတင်ခြင်းလုပ်ငန်းအား အသစ်ထပ်မံ ဖွင့်လှစ်ပေးမည်မဟုတ်ကြောင်း ပြီးခဲ့သည့်ဧပြီလအတွင်းက အခိုင်အမာပြောကြားခဲ့သည်၊
အလုပ်သမားအရေး ဆောင်ရွက်နေသော အဖွဲ့အစည်းများ၏ ခန့်မှန်းချက်အရ ထိုင်းနိုင်ငံတွင် မြန်မာရွှေ့ ပြောင်း အလုပ်သမား (၂) သန်းခန့်ရှိသည့်အနက် ယခုလောလောဆယ်တွင် မြန်မာယာယီနိုင်ငံကူးလက်မှတ် ကိုင်ဆောင်ထားသူပေါင်းမှာ (၇၁,၃၉၀) ဦးသာ ရှိသေးသည်။

အပြည့်အစုံသို့ >>